Verżjoni bil-Malti

__________________________________________________________________________

Il-Ministru tal-Finanzi, l-Ekonomija u Investiment iħabbar livell ogħla ta’ protezzjoni fuq depożiti ma’ banek f’Malta

Nhar l-Erbgħa 8 t’Ottubru 2008, l-Onorevoli Tonio Fenech, Ministru tal-Finanzi, l-Ekonomija u Investiment ħabbar li l-livell ta’ protezzjoni lil depożitanti f’banek f’Malta żdied minn €20,000 għal €100,000 b’effett immedjat.

L-Onor. Fenech emfasizza li huwa vitali li tinzamm il-fiduċja fil-banek tagħna u fl-istituzzjonijiet li jirregolawhom. “Jiena konvint li ma hemmx għalfejn wieħed jallarma ruħu, mhux biss għax il-banek tagħna jitmexxew fuq bażi soda, iżda wkoll sforz l-impenn qawwi li għandha favur il-protezzjoni tad-depożitanti”, huwa qal.

L-Onor. Fenech żied jgħid: “Il-Bank Centrali ta’ Malta u l-Awtorità għas-Servizzi Finanzjarji ta’ Malta kienu kontinwament f’kuntatt mas-suq hekk kif kien hemm l-ewwel sinjali ta’ dan it-taħwid, u kienu qed isegwu x’inhu jiġri fil-banek sabiex jaraw kienx hemm xi problemi li jitolbu għal azzjoni immedjata. Sallum ma kienx hemm sinjali ta’ diffikultajiet f’dawn il-banek. Fil-fatt, is-sitwazzjoni llum hija dik kif ikkonfermata mill-Fond Monetarju Internazzjonali, l-IMF, f’Ġunju li għadda, u ċioe li l-banek tagħna għandhom kapital tajjeb, għandhom ratio għoli ta’ likwidità u għandhom portfolios li huma diversifikati.”

“Tajjeb nenfasizza li l-banek Maltin li huma fdati bit-tfaddil u d-depożiti tal-Maltin mhumiex għaddejjin mid-diffikultajiet li qed iħabbtu wiċċhom magħhom banek f’pajjiżi oħra. B’mod partikolari, il-banek Maltin m’għandhomx problemi ta’ finanzjament b’riżultat tal-iffriżar tas-swieq monetarji internazzjonali. Il-banek f’Malta ma jisselfux mis-swieq internazzjonali sabiex ikollhom minn fejn isellfu u, għaldaqstant, m’għandhomx il-problemi ta’ likwidità li qed ikollhom banek f’xi pajjiżi oħra. L-akbar sors ta’ fondi għal banek f’Malta huma d-depożiti tal-klijenti taghhom.”

L-istqarrija uffiċċjali tinkiseb minn fuq is-sit tad-Dipartiment ta’ l-Informazzjoni.

__________________________________________________________________________

Tagħrif Ġenerali fuq l-Iskema ta’ Kumpens lid-Depożitant f’Malta (b'format pdf)

Tagħrif Ġenerali fuq l-Iskema ta’ Kumpens lill-Investitur f’Malta (b'format pdf)

Aġġornata f’Ottubru 2008